اسمحولي احكي

أول ما بلشت المدونة، كانت الفكرة الأولية أنها تكون بالانجليزي لأنه القراء المستهدفين هم الأجانب بالدرجة الأولى أو العرب المغتربين. استمرت المدونة سنتين تقريبا على هذا الحال...لغاية اليوم! اليوم قررت أنه أكتب بالعربي وبالعامية كمان لأكتر من سبب. أولا من باب ما ننشر غسيلنا الوسخ بالشارع والاجانب يضحكوا علينا وتانياً لأن المستهدفين من هذا البوست هم الأردنيين و مواطنين ها البلد أولا وأخواننا العرب تانياُ.

السبب الرئيسي اللي خلاني أطلع من سكوتي عن مجتمعنا الأردني هو درجة التخلف اللي كل مالها بتزيد بمجتمعنا اللي إحنا نازلين نفتخر فيه. ليش تخلف؟ ما إحنا متعلمين و مثقفين وماشاء الله علينا؟ جايكم بالحكي حبه حبه

أولا بالرغم من كل الحملات اللي عم بعملوها أفراد أو مؤسسات ضد جرائم الشرف ...كلو عالفاضي... لأ والاسوء من هيك انه عم بزيد! كأنه لما بنحكي عن الموضوع بنزكر الناس انه ممكن تعمل هيك بخواتها ؟ يعني مش عارف ها الأخ اللي عامل حاله شريف انه إذا قتل نفس واحد كأنه قتل أمة كاملة فما بالك لما تكون أخته؟ وين التربية الدينية الصح؟ ولا التربية الدينية بنحكي فيها بس ع امتحان التوجيهي و رمضان؟ كيف بنام ها القاضي الي بحكم على قاتل بس سنه؟ كيف إلو عين يصوم برمضان مش فاهم! كيف ما بخجل من أمه اللي ربته وعللمته يحترم كل الناس ...كيف بيتطلع ع بنته أو زوجته أو أخته وهو بعرف إنه عم بشجع قتل صبايا متلهم بس لأنه في واحد شريف قدر يجيب كم واحد يشهد بالمحكمة أنه فعلاً وسخت سمعة العيلة! يا سيدي وإذا وسخت سمعة العيلة مين أعطاك الحق تتعالى على ربنا وتقرر متى تنهي حياة خلقها الله مش انت؟

كيف ممكن النواب بالبرلمان يكونو ساكتين!! ما بخافو ربنا؟ ولا الدين صار موضه هالأيام... والشرف أهم! كيف؟ حد يفهمني !

وبعدين ليه التمييز العنصري بين الزلمة والمرة! يعني ليه بلوموا المرة مش الزلمة؟ ولا البنت نص بني آدمة؟ ربنا هيك علمنا؟ ولا إمكم هيك ربتكم؟ أشك بهذا الحكي

كيف ممكن الاساتذة بالمدارس والجامعات يطلعوا ويضلوا ساكتن على أكبر تخلف بضرب هالمجتمع. والاسوء من هيك أنهم راضيين يخرجوا شباب قليلين ترباية ! قال تربية وتعليم قال !

تانيا نيجي لمشكلة جريمة القتل اللي صارت مؤخرا وعملت زوبعة إلها أول ما إلها آخر... حد يفهمني ها الجماعة مش عاجبهم يعني القانون الأردني؟ ولا مش عاجبيتهم فكرة انه في قانون بين الناس؟ طب مش هدول الناس بآمنو بربنا؟ والتشريع والقانون جاي من ربنا؟ ليش مش محترمين ربنا ؟ ليش مش محترمين سيادة البلد؟ ليش مش محترمين الدستور الأردني؟ طب أوكي بدنا الحق يبين... وقفت ع هاي الجريمة؟ والجرائم اللي بيسووها اليهود بشعبنا بفلسطين ما بدو عطوة أمنية؟ أنا بقول بس يتفقوا ها الجماعة نروح ع غزة نعمللنا كم دراما هناك بنكهة أردنية مع اليهود

أييييح ع هال بلد شو بدو يشوف كمان

في الوقت اللي كل العالم بيحترمنا ع الجهود اللي بنعملها كشعب أردني وكعائلة مالكة عشان ننشرالسلام والثقافة... ونغير الصورة النمطية عن العرب و الاسلام... وبنحارب التطرف بأنواعه، لسه في ناس عايشة في الجاهلية.

أكتر شي مؤذ بالموضوع هو الإعلام الفاشل زي موقع سرايا و غيرها من المواقع الإعلامية اللي نسيت أو بالأحرى عملت حالها معهاش خبر عن موضوع بيع شركة مكتوب دوت كوم لـ ياهو وفضلت تحكي عن قصص فاضية هبله زيهم.

ع كلِ بتمنى شي مسؤول يقرا اللي كتبتوا و يفهمني ليه هيك عم بيصير ببلدنا...وليه عم نرجع لورا وشكراً

P.S. This post is targeted to Jordanians.. to all Non-Arab rearders...its an internal Jordanian issue that i don't wish to share with you.. for personal reasons.